Man nom est Geraint Jennings. J'fus né à St. Hélyi en Jèrri en mil neu chents souaixante-six, et j'y d'meuthe acouo.

J'sis artiste. J'fais d's illustrâtions pouor des livres - sustout pouor les mousses. J'fais des r'chèrches étout entouor l'histouaithe dé l'art en Jèrri et j'sis un membre d'la Section d'l'Histouaithe d'l'Art et d'la Photographie d'la Sociêté Jèrriaise.

J'travâle dans l'êducâtion étout, coumme ensîngnant du Jèrriais pouor les c'menchants dans les clâsses du sé, et j'ai c'menchi à travailli dans l's êcoles étout, ensîngnant not' langue ês mousses.

J'travâle dans d's êcoles dé langues étout, ensîngnant l'Angliais ès êtrangièrs, et dé temps à aut' j'donne des clâsses en Russe.

À l'unnivèrsité, j'tais êtudgiant dé Russe et d'Tchèque et j'pâssit tchiques mais en Russie duthant m's êtudes.

J'ai travailli en France étout, en Brétangne dans eune êcole. Mais auprès l'unnivèrsité, j'rentris en Jèrri à seule fîn dé dév'nîn clèrcot pouor l's Êtats. En êffet, ché n'tait pon eune bouonne idée, et j'tchittis chu travas-là pouor ensîngni un mio.

J'ai travailli à la Mênag'gie d'Jèrri auve les sèrpents et l's aut's annimaux, mais j'n'ai pon d'annimaux siez mé J'aim'thais aver un cat à l'av'nˆn mais pouor ach'teu ch'n'est pon bein pratique.

Jé m'sis mîns sus les rangs coumme candidat pouor l's Êtats - coumme Député et coumme Sénateu, mais ach'teu j'sis êlu au Conmité des C'mîns d'la Pâraîsse d'St. Hélyi - pouor la deuxième fais.

J'sis président d'l'Associâtion des Piêtons dé Jèrri, et j'fais un tas d'travas pouor l'Groupe dé Cyclistes dé Jèrri. L'envithonnement est un grand întéthêt pouor mé, et j'crais qu'i' faut travailli dû pouor amender la vie des gens en Jèrri.

J'aime bein liéthe, êcouter la musique, et jouer sus l'Ithangnie auve man compiuteu. J'sis l'maître-pêtre des Pages Jèrriaises.

J'sis S'grétaithe d'l'Assembliée d'Jèrriais - ch'est la preunmié fais, j'crai, qu'L'Assembliée a un S'grétaithe tchi n'a pon pâlé l'Jèrriais des g'nouors d'sa méthe.